AGATE DEUNA 2024
Heldu da, berriro ere, Agate Deuna ospatzeko eguna. Bezperan, otsailaren 4an, gure herriko kaleetan Santa Agedari eskainitako koplak entzuteko aukera izango dugu.
Andramari Zornotzako Ikastolako kideok ere, makila bana eskuan, hor ibiliko gara etxez etxe kantu kantari. Gorde data agendan!
SANTA AGEDA AGEDA
GURE MARTIRI MAITEA
ETXE HONERI EMON EIOZU
ZORIONA TA BAKEA
Eta LAPIKO BETEA lortzekotan, egun bizi dugun egoerari aurre egiteko gaitasuna erakutsi beharko dugu. Alabaina, ez dugu zalantzarik denon artean lortuko dugula,
Andramari Zornotzako Ikastolan solidarioak izaten badakigu eta.
ZORNOTZA DA GURE HERRIA
BIZI DAITELA EUSKALDUN
AURRERANTZEAN EUSKERAZ BETI
DANOK HITZ EGIN DAGIGUN
Gure hizkuntza zaintzen eta bermatzen aitzindariak izan gara, eta bagara. Sarritan bidean oztopo ugari topatu arren, horrenbestetan erakutsi dugu emaitza bikaina lortzeko gaitasuna dugula.
ANDRAMARI IKASTOLA
ZUEN AURREAN KANTARI
OHITURA ZAHARRAK ESKEINTZEN DEUTSAZ
POZEZ EUSKAL HERRIARI
Egun txarra zein ona egin, Andramari Zornotzako Ikastolako ikasle, irakasle, ikasle ohi, guraso, aitite eta amama, guztiok ere kantuan ibiliko gara, hainbeste maite dugun ohitura zahar horrek bizirik iraun dezan.
AGUR ZORNOTZAR GUZTIAK
IZAN EIZUE URTE ON
HERRI HONETAN IZAN DAITELA
BETE-BETEAN ZORION
Euskaldunak eta euskalzaleak, solidarioak, langileak, ekintzaileak…Eta batez ere, ZORIONTSUAK izaten jarraitu!
