HIZPRO

Andramari Zornotzako ikastolan lantzen diren hizkuntzen ikaskuntzari/irakaskuntzari eta erabilerari dagozkien alderdi guztiak bildu eta haien trataerari koherentzia emango dion egitasmoa da Hizkuntza Proiektua.

Bere hezkuntza- eta hizkuntza-proiektuaren ardatza euskara izanik, ikastolak euskaldun eleaniztunak formatu nahi ditu. Hau da, bertako hizkuntza propioa (euskara) eta kontaktuko hizkuntzaz gain (gure kasuan, gaztelania), atzerriko hizkuntza batean (ingelesa) ere nahikotasun maila lortzea nahi dugu, bai eta laugarren hizkuntza bati buruzko (frantsesa) gutxieneko ezagutza barneratzeko aukera ere eskaintzea.

Hori guztia kontuan hartuta, Hizkuntza Proiektuak ikastetxeko “Hizkuntza habitat-a” hartzen du aintzat: ikastolako komunitatea osatzen dugun guztion hizkuntza-errealitatea lantzea (ikasle eta irakasleena, baina baita familia, langile eta abarrena ere), zehaztutako lehentasunen arabera, globaltasunean aritzeko. Adibidez, hizkuntza guztien ikaskuntza/irakaskuntza ildo berean kokatzeko, ikastolan hizkuntza bakoitzak izan behar duen lekua zehazteko (euskararen lehentasuna argia izanik) eta abar. Horregatik, esan genezake ikastolaren Hizkuntza Proiektuak bere baitan biltzen dituela berton lantzen ditugun hizkuntza guztiak: euskara, gaztelania, ingelesa eta frantsesa.

Hizkuntza Proiektuak beste bi proiektu biltzen ditu bere baitan: Euskaraz Bizi eta Eleanitz (ingelesa eta frantsesa).